|
NOSTO MUSICO
pèr Andriéu Gabriel
IDENTIFICACIOUN
Galoubet-tambourin, flutet tambourin, tambourin : vaqui
tres biais de dire pèr souna la fluto tambourino
de Prouvènço. Lou sustantiéu “galoubet”
que i’a rèn de segur de soun etimoulougìo,
fuguè bessai emplega pèr lou proumié
cop pèr Jan-Jaque Rousseau en 1768 vo, pèr
d’ùni en 1791.
Flutet, diminutiéu de fluto es uno meno de varianto
franceso de “piccolo” pèr souna uno pichoto
fluto, se dis en prouvençau : flahutet.
Quand de cop “tambour basco” e “tambourin”
noun soun emplega à bèl-esprèssi, soulet
lou segound designo lou parèu flahutet-tambour.
Es de nouta qu’apareisson dins li diciounàri
pèr designa la fluto prouvençalo li mot “galoubet”
e quàuqui cop “flutet” pulèu que
lou noum di fluto tambourino d’àutris encountrado.
LOUCALISACIOUN
Despièi uno quaranteno d’an lou relarg de sa
pratico s’es forço alarga.
S’espandis sus li despartamen di Bouco-dóu-Rose,
dóu Var, de la Vau-Cluso, dis Aup-Maritime, dis Aup
de n-Auto-Prouvènço fin qu’à Digno
e Sisteroun emai la Gardounenco. Forço tambèn
se rescontron foro aquéli raro pèr causo de
desplaçamen proufessiounau.
Tambourinaire, Musèe Granet d'Aix-en-Provence (XVIIIème
siècle)
DESCRIPCIOUN
Lou galoubet, fluto cilindrico à bè e à
trau que li tres meloudi dins la partido distalo permeton
de curbi l’ambitus d’uno dougenco (de mi bemòu
5 à si bemòu 6 pèr un galoubet en ut)
pèr degrad croumati, emé poussibleta de l’esperlounga
à-n-uno quatorgenco (de re 5 à do 6).
Designon voulountié lou galoubet “fluto armounico”.
La counjouncioun dóu tapamen de trau emai de la pressioun
dóu boufamen permeton l’emissioun de tóuti
li noto. Ansin lou musician dèu trachi uno memòri-reflèisso
que coumpren segur lou deta, mai tambèn la pressioun
de l’alen propro à caduno di noto (vo group
de dous vo tres noto). La tiero dis articulacioun es de
procho à-n-aquéu de la fluto à bè.
Lou tambourin prouvençau es un tambour bimembranofone
cilindri que lou fust souvènti-fes cisela, fai fin
qu’à 79 cm de aut sus un diamètre de
43 cm pèr li mai gros. Pèr la maje-part di
cas fan 70 cm sus 35 cm. Ço que fai l’ouriginalita
dóu tambourin es la pèu de timbre qu’es
utilisado coume pèu de picage siegue la mai fino
ounte ié vounvouno la cantarello. Un reglage prim
dóu timbre e lou pica mesura d’uno bagueto balejado
(la masseto) baion lou son de-longo vounvounejant.
Marius Fabre dins lis annado 30 fuguè un di proumié
tambourinaire à destibla la cantarello pèr
ié douna mai de liberta d’amplitudo dins sa
vibracioun emai à pica la pèu au mitan, sus
lou timbre, coume acò semblavo se faire au siècle
18en. Un biais de jouga mantengu pèr li musician
varés. Autro-part se pico au mitan fourviant la cantarello.
Pèr tradiciounau que siegue, lou tambourin de vuei
a integra en plen aqueste biais nouvèu tant que l’aubouro
en principe assoulu.
André
Gabriel
EVOUCACIOUN
(ISTOURICO)
Aperaqui dóu siecle desen fin qu’à l’acabado
de la reneissènço, atrouban dins touto l’Europo,
li fluto tambourino dins l’icounougrafìo, la
tapissarié, la pinturo e l’esculturo.
Lou parèu instrumentau s’endevèn just
e just pèr la danso coume pèr li courtege
e proucessioun. S’agis dóu cop d’un estrumen
de meno “universalo” tout parié que d’estrumen
dóu meme tèms. Semblarié que tre la
debuto dóu baroco, pèr encauso de mudo di
goust e di besoun, li musician se destaquèsson de
la fluto tambourino. Aquelo d’aqui se tanco alor dins
de cantoun pèr i’evouluna de façoun despariero.
Sènso endico geougrafico, mai emé clarta,
lou paire Marin Mersenne retrais en 1636 uno fluto de tres
trau que lou jo di det es pas parié d’aquelo
de vuei. Au contro lou tambourin counforme au nostre es
bèn loucalisa en Prouvènço. Tenèn
aquélis entre-signe dóu sestian Peiresc que
li mandè au paire Minime.
Jove tambourinaire, Festival du Tambourin d'Aix-en-Provènço
TRASFOURNACIOUN
Li fluto tambourino, talo li violo à rodo i man dis
amusaire publi fuguèron bono-di la modo qu’a
fa espeli la musico campèstro de la fin dóu
reinage de Louvis lou XIVen à la Revoulucioun. Soulet
d’aquelo meno d’estrumen, lou flutet-tambourin
faguè mirando tant au tiatre emé lis oupera-balet,
en musico de chambro, qu’i bal campèstre, de
l’oupera em’un repertòri pletouri coumun
i museto, auboi, violo, viouloun, fluto... e de virtuose
parisen e quàsi segur, nourmand !
Tambourinaires a Toulon, 1900.
DE
REVOULUCIOUN EN REVOULUCIOUN
Tournamai emé la Republico lou tambourin fai dansa…
Li recerco sus li troubadou inicia pèr li roumanisto
alemand, alargado pèr Raynouard, pièi Darmesteter
an d’un biais ajuda l’espelido dis escolo naciounalo
caro au Roumantisme e, en meme tèms, la foundacioun
dóu Felibrige, mai aqui dessus faudrié faire
d’alongui.FOUCLOURISACIOUN
Frederi Mistral, Prèmi Nobel de Literaturo e li felibre
an farga la reneissènço de la lengo d’o
“dis Aup i Pirenèu” emai di tradicioun.
Lou flahutet-tambourin fuguè enaussa “estrumen
naciounau de Prouvènço” e soun repertòri
toumba au “repertòri naciounau”. Li group
fouclouri avien pèr toco l’espandimen de la
lengo, de la memòri, de la culturo, de la musico.
Fourmavon de fougau atravali bagna de regiounalisme senso
pamens lou mendre engajamen pouliti que siegue. L’envanc
de la fouclourisacioun, es que de mantenènço
de pacoutiho e descoutado d’uno tradicioun amoussado
vo vers soun avalimen.
Festival dau Tambourin d'Aix-en-Provènço
EVOULUCIOUN
Pau à cha pau lou fóuclore de vuei se mudo
de-vers un espàci artisti mounte se creon balet e
“tablèu”. D’encadenamen de danso sabènto
vo païsano enfeston segur lou publi, pèr provo
lou mounde au Festenau dóu Martegue que ié
vèn coume l’avé à la sau, mai
apetega pèr lou “fóuclore scenougrafia”,
“lou fóuclore recounstituï”, li musico
renouvado leissant de caire l’autenticita.
Festival dau Tambourin d'Aix-en-Provènço
ISTITUCIOUNALISACIOUN
La situacioun dóu fóuclore en Prouvènço
es à quaucarèn proche aquelo dis àutri
regioun de Franço. En 1981 lou Menistre de la Culturo
e lou direitour de la musico durbisson lou tai d’uno
refleissioun pourtant sus li poussibleta d’ensigna
li musico tradiciounalo dins li Counservatòri e Escolo
Naciounalo de Musico. Madurado de tèms e de tèms
la proumiero cessioun pèr l’óutencioun
dóu CA es duberto en 1987, en 1989 pèr lou
CE. Despièi 1973 de cous de tambourin eisistavon
au counservatòri de z-Ais e despièi 1981 en
Avignoun. De questioun pregoundo se pauson alor d’un
biais qu’es pas coustumié pèr l’epoco
e d’ùni se senton agarri. S’agis pas d’èstre
un virtuose à se regarda l’embouligo mai èstre
tout à un cop musician, musicoulogue, etnomusicoulogue,
cercaire, creatour e pedagogue. Subran lis assouciacioun
roumpeguèron busqueto emé l’istitucioun.
La recouneissènço tant souvetado a fali. La
trasmessioun, lou repertòri, l’improuvisacioun
empuravon lou gavèu dóu mescord. L’enganado
venguè de tèsi óuficialo metènt
dins la memo saco tóuti li musico tradiciounalo de
Franço e dóu mounde. Li di e contro-di an
mescla estrumen e repertòri tradiciounau. Fuguè
estrange de vèire lis assouciacioun e federacioun
fóuclourico apara lou repertòri de musico
savanto qu’es just e just lou rebous de si prestacioun
abitualo. Pèr provo la moulounado de signaturo reculido
pèr lou Coumitat de Defènso dóu Tambourin.
Verai que lou galoubet-tambourin es mai tradiciounau pèr
sa presènci que pèr soun repertòri,
mai se pòu pas ounestamen mescla uno poulka memo
s’es de tradicioun ourfeounico e uno sounato que ié
dison tradiciounalo souto l’escampo que fuguè
coumpausado pèr l’estrumen ! Fin finalo, lou
tambourinaire cerco lou mot de santo Claro dins aquelo sournuro
degudo i resoun soufisto e revisiounisto que de cop que
i’a atupisson.
D’ùni que se dison espert an fa siéune
aquelo garrouio de noun-rèn que bèn vai toco
bèn pau de musician nèsci de desenfourmacioun.
Festival
dau Tambourin d'Aix-en-Provènço
DE-VERS
LA MEGA-FUSIOUN
La tradicioun, s’es forto s’ajusto en tóuti
li tèms sènso pèr acò ié
perdre soun èime. Aquéli que la porton ié
baion vido. La tradicioun, art de viéure emai de
partage emé d’autre es la marco founso d’uno
civilisacioun. Pas mai dóutrino que normo d’un
couvènt, es pulèu uno filousoufìo,
uno clau que duerb à la coumprenesoun dóu
mounde, uno meno d’umanisme. Counèisse vo parteja
uno tradicioun es pourta respèt à la diferènci,
es toulera e s’enrichi l’un l’autre.
Entrepachado dins un fóuclourisme caia, la musico
nostro avié, tre lis annado 70, fougna li courrènt
de la “folk-music”. Fau pamens apoundre à
sa descargo que d’aquéu tèms li galoubet
en La èron semena clar. Li mai noumbrous en Si au
ton de sant Barnabé noun s’encapavon emé
acourdeoun, viouloun vo guitaro. A faugu espera quàuquis
an lou randès-vous emé li musico tradiciounalo
à grand espetacle. Dins l’endrechiero de group
“Mont-Joia” e “Bachas” li chourmo de
musico, de cant de balèti creisseguèron à
mouloun. Arrenjamen, creacioun, coulèito, cansoun
de touto meno (engajado, pouetico, umouristico, tradiciounalo)
fasien de prougramo ecleiti devengu de referènci.
À moun avejaire, aquéli councèrt, vesprado
e balèti an sa part dins la reüssido de la gaucho
en 1981. D’aquélis annado s’es vist de
creacioun des “Musiciens de Provence” (1971) qu’an
sourti uno deseno de disque. An coumpli un travai espetaclous
en tirant la fluto tambourino de soun mole fóuclouri
e ié pourgi uno leituro óuriginalo di tèste
ancian (de l’Age-Mejan à la Reneissènço,
ansin qu’un repertòri mai regiounau e recènt).
Tout d’uno, dins sa draio, mai que d’un ensèmble
se soun crea à Touloun, Ais, Avignoun, Mountdragoun…
La musico prouvençalo (quàuqui cop d’aflat
óucitan) enfin avié renousa ‘mé
soun passat arqueou-musicoulougi e se descurbissié
un aveni. Avié un publi. Devenié enfin “pourtarello”.
Emé li “nouvèlli musico tradiciounalo”,
“li musico crousado”, la “World Music”,
lou jazz de vuei dubert i musico e estrumen tradiciounau,
l’escagno s’embouio…
Forço musician tambourinaire : Miquèu Montanaro,
Ramoun-Jan Audigane, Andriéu Gabriel, se soun d’efèt
manda dins l’estùdi menimous d’aquéli
lengage d’entre-mesclamen mounte l’escàmbi
e lou toco-toco dis estile e di proufiéu coungreio
d’arquèmi nouvello.
Es mai-que-mai grand lou plesi de “faire” aquelo
musico, mai fau bèn se rèndre comte que lou
publi noumbrous, afeciouna e counquista, vèn s’embuga
d’uno musico nouvello que noun identifico coume prouvençalo
(vo óucitano). Dins aquel espàci artisti,
lou publi prouvençau tradiciounau noun se retrovo
pas. (Segur que i’a d’eicecioun). Lis obro de
musico d’aro sabènto qu’ai agu lou plesi
de crea soun acara à-n-uno situacioun proun pariero
: obro de Demillac, Desportes, Challuleau, Formosa, Mortagne,
Conte. Fau jamai óublida que la creacioun es signe
de bono santa pèr un art, uno pratico. La creacioun
“sabènto”, la musico countempourano d’un
biais generau es de longo contro-istado à-n-aquéu
proublèmo de recouneissènço pèr
un publi alarga. Dins l’ensèn, la creacioun
en musico tradiciounalo es miés acetado, acò’s
bono marco pèr lou gènre : realisacioun de
Montanaro pèr eisèmple. D’ùnis
enregado soun cavado, talo l’improuvisacioun e la releituro
de coulèito e de proto-tèste : Renat Sette,
Ataié Damase…
Jamai la tradicioun prouvençalo a enaura l’improuvisado,
au mai de liberta dins li flouriduro, lou contro-cant e
li picamen dóu tambourin. Sian aqui davans uno nouveta.
Que se trasferis un biais de faire sus un estrumen qu’a
priori es pas fa pèr acò. Au moumen fugidis
mounte jogo, l’improuvisado es lou rebat de la pensado
dóu musician. S’apound à la tradicioun
nostro uno tradicioun universalo en usanço en Indo,
en Africo, en Sardegno vo dins lou jazz… Noun se pòu
fourça lou tambourinaire à improuvisa mai
se dèu de lou durbi à-n-aquelo chausido e
founda un rode d’assai.
Faus proublemo que d’escarteira moudernisme à
tradiciounalisme qu’acò ‘s de soufisme.
Ansin aquéli noumbròusi sensibleta recaton
de proufessioun de fe pèr d’ùni, vo de
batèsto de darrié badau pèr lis àutri,
s’atrovon pèr cop d’astre acampa au toco-toco,
cade an au moumen dóu Festenau dóu Tambourin
de z-Ais, ourganisa pèr l’Escolo felibrenco
Li Venturié e Jaque Mouttet.
Festival dau Tambourin d'Aix-en-Provènço
QUÀUQUI
QUESTIOUN
Es-ti que la musico prouvençalo de noste tèms
interesso qu’aquéli que soun pas prouvençau
? Es-ti que la coumunauta nostro patis dóu coumunautarisme
?
De que se pòu faire sènso cabussa dins la
lèco dóu naciounalisme artisti pèr
desviha li counsciènci que, pèr tant bèlli
que siegon li musico creado e jougado en Prouvènço,
se dèvon d’apetega tambèn li Prouvençau
?
Coume liga au nostre prouducioun musicalo e publi, dóu
meme biais qu’acò se fai encò de noste
veisin catalan, basco e bretoun ?
PROUPOUSICIOUN
DE
COUNCLUSIOUN
La duberturo dóu balet fóuclouri à
d’àutri meno d’estile pòu que rejouï.
Bello demoustranço emé lou Ballet Zéphir,
eiretié de fourtuno de la coumpagnié de danso
franceso, sènso desóublida pamens li lausable
esperfors couregrafi e musicau de la Capouliero dóu
Martegue, de Flour de Rose de Mountdragoun, d’àutri
group encaro bèn enrega dins l’esperit dóu
regreta Danié Audry dóu Roudelet de Castèu-Goumbert.
Fau bèn s’avisa que tóuti li tambourinaire
(vo quasi) de Maurise Guis à Miquèu Montanaro
sorton de group fóuclouri. Es parié pèr
li musician de trìo de la jouino generacioun. Es
eisa de leva la sau à-n-aquéli fourmacioun
mai l’istòri de la musico prouvençalo
noun se pòu dessepara de soun acioun despièi
mai d’un siecle. À la grosso se pòu regreta
que desfauto de qualificacioun e de refleissioun d’ùni
baile pièi dire emé cinisme que “lou
fouclore es un mau necite” Mai fau arresta d’óupausa
fouclore e musico tradiciounalo, en Prouvènço
pèr lou mens, qu’acò sarié se
coupa de noste sustànci.
Segound li dounado soucio-antroupoulougico es de crèire
que nòsti pople lèu s’endraion de-vers
lou pluriculturalisme degu au barrulage di gènt.
À-n-acò fau apoundre li tendènci vers
l’eisoutisme, pèr batre l’antifo, lis escàmbi…
Aqueste doumaine dis etnoulogue soulet se duerb aro en tóutis
aquéli que volon n’en saupre mai sus soun veisin.
L’envans dóu pluriculturalisme fai efèt
sus la creacioun mesclado d’uno musico nouvello que
sounan toujour “tradiciounalo” quàuqui
cop “world music”. Es la musico d’un tros
dóu mounde de vuei recampant d’influènci
prouteïformo en deveni perpetuau, d’ounte la noucioun
d’autenticita es de manco (emé lou risque d’aculturacioun).
Mai vo mens dins cènt an aquelo musico sara tradiciounalo
engaubiado de mant uno culturo en rebat de la soucieta.
Aquelo visto foro-bandis en rèn la musico nostro
e li Prouvençau que sènso s’apesanti
dins lou chale d’uno parladuro quàuqui cop foro
resoun, dèvon aceta l’evoulun dóu tèms
sènso manca de s’endrudi de la tradicioun pèr
reprendre soun vanc. La tradicioun noun es un bàrri
qu’assousto, es uno voio qu’es pas de dire que
douno de viéure coutrìo emé soun tèms
sènso desmemouriamen e languitòri. Li raro
de la musico tradiciounalo soun aquéli dóu
musician tradiciounau. Se devèn de farga lou mai
poussible de jouine à-n-aquelo usanço de mestié
vo afeciounado, de ié durbi lou cor, l’esperit
e lis auriho, de ié faire rendre comte, cadun à
despart, que soun pourtaire d’un umanisme, d’uno
memòri couleitivo, d’uno especificita identitàri,
emai que lou mounde de deman, aluencha de censuro e de jujamen
d’un toun pestelarèu esclusiéu sara pasta
de toulerènci de diversita e d’amour en just
e just en balanço à ço que fan mostro.
À cadun d’entre nautre soun siéu si lendeman
; à nautre fabricaire de pantai soulide de bèn
basti, founs e duradis. À l’obro.
Andriéu
GABRIEL
Setèmbre 2001
Version provençale : Jacque Mouttet
|
