|
FREDERI MISTRAL E LA MUSICO IDENTITÀRI
PROUVENÇALO
Pèr
Roumié Venturo
Frederi
Mistral
La
reneissènço prouvençalo, qu’espeliguè
dins lou mitan dóu siecle XIXen, s’encapo pas
soulamen ligado au prefa isoula d’un engèni
que ié dison Mistral. L’on pòu trouba
la coumençanço d’aqueste mouvemen - que
fau d’aiours remetre dins lou païsage culturau
de soun tèms -, tre li darriéris annado de
l’ancian regime. Es pamens segur que l’obro Mistralenco
fuguè grando dins lou debana de tout acò.
L’influènci dóu pouèto sus la
defenicioun d’un èime identitàri prouvençau
es inmènso, en coumençant segur pèr
uno nouvello digneta lenguistico, dóumaci uno ourtougràfi
e uno literaturo, que sa grando qualita, fin qu’à
vuei, calè jamai. N’i’avié pas proun
d’acò, pamens, pèr enracina un mouvemen
regiounalisto ambicious. Tóuti li biais d’uno
culturo poupulàri vertadiero duvien aguedre la mumo
reneissènço, pèr fin de crea, dins
soun plenun, un vertadié patrimòni regiounau.
Vaqui perqué Mistral travaiè tambèn
sus la musico, tant au nivèu de la cansoun que pèr
ço qu’es de la musico identitàri.
Mistral e li cansoun -
D’un biais forço simbouli, l’on pòu
d’en proumié arremarca qu’es emé
la cansoun que Mistral fuguè couneigu dins li mitan
literàri parisen. Carga pèr lou ministèri
de faire uno enquisto sus lou cant poupulàri en Prouvènço
dins lou cadre de la famouso messioun Fortoul , es lou literatour
d’óurigino prouvençalo Adòufe
Dóumas - tiravo de Cabano - que recoumandè
lou jouine Maianen à Lamartino. Tout acò dounè
pièi la seguido que l’on saup .
Dóumas avié pres lengo emé Mistral
pèr ço que i’avien di qu’aquéu
d’aqui travaiavo sus li cansoun prouvençalo.
Es que vouguè metre dins Mirèio un moucèu
d’aqueste biais, la famouso Cansoun de Magali. En realita,
s’agis d’un pouèmo vertadié, fa
d’un biais requist pèr Mistral dins l’estile
di cansoun poupulàri, coume uno meno d’imitacioun.
Magali es uno bello provo moustrant coume lou pouèto
couneissié bèn tout acò. Pèr
Magali, s’ispirè d’un souveni que countè
forço mai tard: " À L’époque
où je songeais à rimer une chanson d’allure
populaire sur le thème provençal et rudimentaire
de Magali, j’entendis un des laboureurs de mon père
chanter une chanson provençale sur l’air en
question que je ne connaissais pas encore et qui me parut
fort joli, et je rimais Magali sur le rythme de la chanson
susdite… " . S’agissié de la cansoun
Bonjour lou Roussignòu Sóuvage, que ié
cantè Jan Roussiero, un ràfi dóu mas
mistralen, devers lis annado 1855. Causo interessanto fasènt
proun vèire coume Mistral avié bèn
coumprés la questioun, l’escrivan coumpausè
soun obro sus lou biais di cansoun " à metamourfòsi
", bèn couneigu dis especialisto. L’èr
de Magali es pamens uno vertadiero creacioun, que soun ritme
soulet ramento un pau la musico óuriginalo cantado
pèr Roussiero . Dins tóuti li cas, l’obro
devendra famouso, rintrant lèu-lèu dins lou
patrimòni di cant poupulàri emai identitàri
prouvençau.
Mume se fuguè pièi mens fidèu à
l’estile poupulàri emai anounime, Mistral calè
jamai de coumpausa de cant. Fau dire qu’acò
se fasié forço, à l’epoco, dins
li mitan letru. I’avié tambèn la voulounta
de crea uno tiero de " cant naciounau " pèr
fin de magnifica l’identita nostro, coume l’amavo
tant lou siecle XIXen, afeciouna de naciounalisme. Es ansin
que lou Mèstre faguè un mouloun de cansoun,
publicado pièi dins si recuei pouëti , sènso
óublida aquéli que s’atrobon tambèn
dins La Rèino Jano. Lou pouèto s’es lou
mai souvènt acountenta de faire de paraulo sus quàuqui
musico couneigudo e qu’amavo seguramen - cant poupulàri,
nouvè… -, franc de l’odo À la Raço
Latino, publicado dins la segoundo edicioun dis Isclo d’Or.
S’agis d’un pouèmo fa dins l’escasènço
d’èstre di pèr li fèsto latino
de Mount-Pelié, en 1878. Es soulamen en 1883 que
lou coumpousitour Charles-Amédée Mager fara
uno musico que trasfourmara, de-bon, la pouësìo
en cansoun vertadiero .
La majo part di cant fa pèr Mistral rintrèron
d’un biais eisa dins lou repertòri di cant poupulàri
prouvençau, espandi pèr li soucieta felibrenco
e li group fóuclouri dins lou siecle XXen. Prendren
d’acò dous eisèmple chanu.
Publicado dins Lis Isclo d’Or, la Cansoun de La Coupo
es segur la trobo mistralenco la mai couneigudo. De-bon,
aquesto cansoun es devengudo l’inne identitàri
prouvençau, tant coume lou soun encò siéu
li Se canta óucitan o Els Segadors catalan. Es en
1867 qu’aquéu cant fuguè coumpausa pèr
l’acuiènço en Prouvènço
d’uno coupo, simbole de l’amista prouvençalo-catalano.
L’èr óuriginau que serviguè à
Mistral es aquéu d’un nouvè, Guihaume
Tòni Pèire, antant attribuïdo à
Micoulau Sabòli – l’on saup vuei que soun
autour vertadié es lou Fraire Serapioun -, Mistral
s’acountentant soulamen de trasfourma un pau la darriero
fraso de la meloudìo. Ço qu’es forço
interessant, es que La Coupo Santo sèmblo d’èstre
estado coumpausado, tre la debuto, pèr que devenguèsse
un inne, e pièi que serviguèsse dins un rituau
leva de la simboulico judeo-crestiano emai di Franc-Maçoun.
Quàuqui doucumen inedi nous dounon mume à
pensa que Mistral e Jóusè Roumaniho aguèron
aquesto idèvo avans la creacioun de la cansoun, dins
un tèms que lou mouvemen prouvençalisto voulié
marca lis esperit ‘mé de simbole ufanous . Es
bèn verai que li dous ami capitèron bèn
dins soun prefa...
Cantado pèr lou proumié cop en 1900, La Respelido
fuguè pièi publicado dins Lis Óulivado.
D’óurigino pas gaire couneigudo, l’èr
d’aqueste cant fuguè recoupia en Arle pèr
un musician d’aquesto vilo, Estève Jaquié
(1843-1910) – acampè tambèn uno autro
meloudìo, aquesto di Toundèire d’avé
. La Respelido es tambèn un moucèu de circoustànci.
Mistral lou coumpausè pèr uno Santo-Estello
, dins l’escasènço de magnifica li parla
e li païs d’O, apara pèr lou Felibrige.
Mistral faguè pamens tout acò d’un biais
particulié, moustrant proun soun biais de vèire.
Chasque coublet es dedica à-n-uno prouvinço
d’O, dóu tèms que lou refrin es counsacra
à la Prouvènço, qualificado de "
maire qu’a batu l’aubado ". Aproufichant
de l’usanço qu’avien à l’age
mejan li noum Prouvènço e Prouvençau
– pouvien designa tóuti li païs d’O
mieterran -, fièr tambèn d’èstre
li cepoun de la reneissènço d’O dóu
siecle XIXen, Mistral e sis ami revendicavon pèr
Prouvènço uno meno de preeminènci.
Tóuti li païs d’O èron mume quasimen
counvida de prene la " Maire Prouvènço
" coume unenco referènci. Aquesto idèvo,
emai li reacioun contro, mestrejaran tout lou debana di
mouvemen regiounalisto d’O dins lou siecle XXen, e
La Respelido es de-bon un doucumen precious sus la debuto
de tout acò .
|
Mistral
e Daudet
|
Tambourinaïres
a Toulon, 1900
|
Mistral
e lis estrumen identitàri prouvençau -
L’autour de Mirèio faguè pas qu’acò
pèr douna à Prouvènço uno identita
enca mai grando. En foro de soun travai persounau de pouèto,
de leissicougrafe e de museougrafe, encourajè tambèn
sis escoulan à faire parié pèr lis
àutri partido de la culturo poupulàri nostro.
Pèr coumença ‘qui dessus, nous acontentaren
de rapela que la reneissènço dóu tambourin
au siecle XIXen es uno seguido de l’acioun menado pèr
Mistral e lou Felibrige. D’efèt, es dóumaci
Mistral que lou Sestian Francés Vidau (1832-1911)
fuguè l’autour de la respelido dóu galoubet-tambourin
dins lou mume tèms. En 1862, aquest óubrié
tipougrafe, que devendra pièi biblioutecàri,
fuguè guierdouna pèr un councous literàri
felibren dins lou cadre di fèsto de la Santo-Ano
d’Ate em’un estùdi escri en lengo nostro,
e counsacra is estrumen prouvençau. Dous an après,
Vidau publiquè soun libre en chausissènt un
titre clafi de significacioun ; Lou Tambourin : istòri
de l’estrumen prouvençau . Dins un biais segur
diferènt, se pòu dire qu’aqueste voulume,
aura, pèr ço qu’es de la musico, la mumo
seguido qu’aguèron Mirèio e Lou Tresor
dóu Felibrige. Coumençant de coudifica l’istòri
e lou repertòri dóu tambourin que sa pratico
èro en trin de s’anequeli, l’obro de Vidau
sara la debuto d’un mouvemen de recoubranço
musicalo que lou siecle XXen n’en veguè pas
la fin .Mistral aguè tambèn uno acioun mai
persounalo, mume s’acò ‘s mens couneigu,
dins lou debana de la pratico dis estrumen prouvençau.
Se pòu dire que ié sian duvènt d’agué
mai fa jouga dóu tambourin dins lou terraire roudanen.
D’un biais que fau nouta, lou pouèto vouguè
metre noste estrumen dins si Memòri e Raconte , mounte
n’en fai jouga pèr un ouncle. La pratico dóu
galoubet-tambourin avié pamens dispareigu de la regioun,
entre Arle em’ Avignoun, dins li proumiéris
desenado dóu siecle XIXen. Es que lis armounìo
e lis ourquèstro avien pourta un cop quasimen fatau
is us tradiciounau dins touto la Prouvènço.
Li terraire sestian e marsihés, soulet, restèron
un pau fidèu au tambourin, mume s’aqueste d’aqui
ié couneiguè tambèn uno duro councurrènci.
Tout acò esplico perdequé pouvèn se
demanda se lou testimòni de Mistral sus soun ouncle
Benòni es pas esta inventa. Lou pouèto anara
encaro mai liuen dins soun interés pèr lou
tambourin. Sachènt que s’ourganisavo, dins Paris,
uno Espousicioun Universalo en 1900, lou pouèto proufichè
d’aquesto escasènço pèr faire
crea un group de tambourinaire à Maiano e lou manda
pièi dins la capitalo. Pèr acò faire,
baiè la direicioun dóu proujèt à-n-un
cousin siéu, Pèire Damian, en quau faguè
aprene à jouga dóu tambourin. Mistral éu
mume ourganisè ‘mé siuen li escourregudo
du nouvèu roundelet, en quau ié metiguè
lou noum de Li Cardelin. Après la guerro de 1914,
es tambèn un parènt de la famiho Mistral que
faguè mai jouga dóu tambourin en Avignoun.
Mort en 1925, Felipe Clamoun es lou fondadou de la proumiero
soucieta de tambourinaire creado, à l’epoco,
dins la Ciéuta Papalino - èro liga ‘mé
la famiho maternalo de Mistral. Semblarié mume qu’es
devers li Maianen qu’aquest ancian fifraire venguè
prene de cous pèr touca dóu tambourin. Sis
ativeta saran pièi perseguido pèr lou drole
d’aquéu, Jóusè-Nouvè Clamoun
(1888-1978), qu’enracinè la pratico dóu
tambourin en Vau-Cluso. Dins, lou mume tèms, lis
estrumen prouvençau s’espandisson en Arle dóumaci
l’acioun dóu felibre Marius Fayard (1877-1956),
alors counseié municipau. Emé sa cargo poulitico,
aqueste d’aqui faguè crea un cous de galoubet
à l’escolo de musico de la vilo, baia à
Felipe Clamoun. La fourmacion de musician rendiguè
poussiblo la foundacioun, en 1923, de la soucieta de tambourinaire
Li Cigaloun Arlaten qu’à soun tour fara jitello
dins tout lou païs d’Arle. Es enfin mestié
d’evouca la memòri dóu Sant-Roumieren
Jóusè Óulivié (1897-1964). Aguènt,
éu, mai aprés à jouga encò di
tambourinaire maianen dins lis annado 1940, soun travai
marcara forço lou tambourin dins la secoundo mita
dóu siecle XXen. Óulivié ‘s d’efèt
lou bèu proumié que metiguè li meloudìo
di troubadou dins lou repertòri dis estrumen prouvençau
.
 |
 |
L’obro de Mistral pèr nòstis estrumen
a seguramen passa lis esperanço dóu Maianen.
Lou tambourin s’esparpaiè mai en Prouvènço,
e subre-tout dins tout lou païs roudanen . Tout acò
d’un biais tant fort que lou grand publi se pènso
souvènti cop qu’aquesto encountrado – la
Prouvènço " mistralenco "…-
se capito de-bon lou cor vertadié dóu tambourin,
alors qu’aquest d’aqui s’atrobo pulèu
à-z-Ais vo à Marsiho…*
Vièio entita istourico emai umano, que soun óurigino
vèn de l’antiqueta, e que vòu pas disparèisse,
la Prouvènço veguè soun èime
estudia e magnifica, dóu siecle XVIIIen fin qu’à
vuei. Se Mistral es simplamen un maioun dins uno cadeno
de cercaire e d’afouga que coumencè bèn
avans éu e que countùnio, fau bèn recounèisse
que lou Maianen aduguè forço dins la fourmacion
de l’identita nostro coume la couneissèn vuei.
Pèr un mouloun de resoun, e bessai mume autant que
li causo puramen literàri vo linguistico, se vèi
proun coume la musico n’en douno uno provo chanudo...
Roumié VENTURO
|
